Stjórn Icelandair hefur hafnað tilboði Michelle Roosevelt Edwards Ballarin uppá sjö milljarða króna. Þátttöku Ballarin í hlutafjárútboði Icelandair er því lokið. Fréttablaðið greindi frá í morgun. Samkvæmt þeirra heimildum gat Ballarin ekki reitt fram tryggingar til sönnunar á að fjármagn væri til staðar.
Ballarin keypti, eins og frægt er orðið, eignir WOW air úr þrotabúi félagsins og lagði í gær fram sjö milljarða tilboð í hluti Icelandair. Sagði talsmaður hennar að hún vonaðist til að sitja uppi með um 25% af hlutum félagsins.
Eftirspurnin eftir hlutum félagsins nam um 37,3 milljörðum og var umframeftirspurn eftir hluti í félaginu því um 85%. 11.000 einstaklingar og fyrirtæki tóku þátt. Boðnir voru til sölu 20 milljarðar í nýjum hlutum á genginu 1. Heimild var til að stækka útboðið um 3 milljarða, og verður sú heimild nýtt.