James Hatuikulipi, einn þriggja hinna svonefndu „hákarla“ í Samherjaskjölunum, og fyrrverandi stjórnarformaður hjá sjávarútvegsfyrirtækinu Fishcor í Namibíu, bar fyrir rétti í Namibíu í dag að uppljóstrarinn Jóhannes Stefánsson hefði dregið sér fé frá Samherja til að fjármagna eigin fíkniefnaneyslu.
Þetta kemur fram á Viljanum í kvöld en heimildin er Twitter-síða blaðsins The Namibian.
Í Twitter-færslu The Namibian segir: „Hatuikulipi staðhæfir að uppljóstrarinn í Fishrot hneykslinu, Jóhannes Stefánsson, hafi dregið sér fé frá þáverandi vinnuveitanda sínum, íslenska sjávarútvegsfyrirtækinu Samherji, til að fjármagna fíkniefnaneyslu sína. Hann segir að Fishrot málið sé afleiðing af óvild Jóhannesar í garð Samherja.“
Dómsmálið snýst um meintar mútugreiðslur Samherja til namibískra ráðamanna í því skyni að fá úthlutað makrílkvóta við strendur Namibíu.