Tveir létust í árekstri bifhjóls og húsbíls á Vesturlandsvegi á Kjalarnesi, norðan Grundarhverfis, í dag samkvæmt tilynningu frá Lögreglu. Tilkynning um slysið barst klukkan rétt rúmlega þrjú í dag.
Ökumaður bifhjólsins og farþegi á því létust í slysinu, en ökutækin voru að koma úr gagnstæðri átt. Annað bifhjól kom aðvífandi þegar áreksturinn varð og missti ökumaður þess stjórn á hjólinu og féll af því. Hann var fluttur á Landspítalann til aðhlynningar og er líðan hans eftir atvikum, segir enn fremur í tilkynningunni.
Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins en samkvæmt lögreglu er ekki grunur um hraðakstur. Nýlagt malbik er á veginum þar sem slysið átti sér stað og var það mjög hált í dag. Í samtali við mbl.is í dag sagði Ásgeir Þór Ásgeirsson, yfirlögregluþjónn hjá Lögreglunni á höfuðborgarsvæðinu að malbikið hefði verið eins og skautasvell en Vegagerðin hafði varað við hálu malbiki á svæðinu fyrr í dag.