„Þetta er einfaldlega þannig að núna þurfa allir að hugsa aðeins öðruvísi,“ segir Ingibjörg Ólafsdóttir hótelstjóri Hótel Sögu í samtali við DV. Fyrirhugað er að bjóða háskólanemum upp á að leigja herbergi á hótelinu næsta vetur. Rétt eins og önnur hótel og gististaðir hefur Hótel Saga þurft að horfast í augu við hrun í bókunum en aðeins sjö prósent nýting var á herbergjakosti hótelsins í maí.
Í samtali við DV segir Ingibjörg að sérstaklega sé verið að horfa til skiptinema og erlendra gestakennara.
„Landslagið er auðvitað öðruvísi, það er meira framboð en áður af húsnæði fyrir erlenda stúdenta. Við ákváðum samt að prófa þetta og núna í byrjun maí prófuðum við að auglýsa þetta inni á facebooksíðu sem er fyrir erlenda skiptinema og gestakennara. Við höfum fengið nokkur viðbrögð og það er áhugi fyrir þessu. Við erum vel staðsett og í miklum samskiptum og samvinnu við háskólaumhverfið.“
Þá segir Ingibjörg að mismikil þjónusta muni fylgja herbergjum eftir því hve lengi fólk dvelur þar.
„Sumir eru kanski að fara að dvelja mjög stutt og vilja þá fá morgunmat og þess háttar, aðrir koma til með að dvelja í nokkra mánuði og vilja þá kanski bara fá lágmarksþjónustu.“
Þá segir Ingibjörg: „Við erum ekki búin að útfæra þetta nánar, en það er allavega nóg pláss hjá okkur. Við vonumst að ferðaþjónustan muni taka við sér á næsta ári og í bili erum við að horfa á þetta fram að áramótum, hugsanlega fram á vorið.“