BBC birti rétt í þessu frétt þess efnis að Boris Johnson forsætisráðherra Bretlands hefði verið lagður inn á gjörgæslu.
Boris Johnson greindist með veiruna fyrir nokkru síðan en var þá lítið veikur og sinnti starfsskyldum sínum heiman frá.
Í gær var Johnson hins vegar fluttur á St. Thomas sjúkrahúsið, 10 dögum eftir að hann smitaðist, að sögn í öryggisskyni, þar sem einkennin voru þrálát og honum hafði versnað. Hann var hins vegar ekki enn talinn þá vera mjög veikur.
Sky News hefur eftir talsmanni forsætisráðherrans að honum hafi versnað í dag og því hafi verið ákveðið að færa hann inn á gjörgæsludeild.
Uppfært: Johnson er með meðvitund og var færður inn á gjörgæsludeild þar sem möguleiki er á að hann þurfi að notast við öndunarvél.