Nokkuð var um skráningar í dagbók lögreglunnar á höfuðborgarsvæðinu í gærkvöldi og nótt. Tilkynnt var um þjófnað úr matvöruverslun við Fiskislóð og þeir grunuðu stöðvaðir er þeir yfirgáfu verslunina með varning sem þeir greiddu ekki fyrir.
Rétt fyrir klukkan 18 var tilkynnt um þjófnað á vesku úr yfirhöfn starfsmanns í fyrirtæki í Árbæ. Yfirhöfnin hafði verið í kaffistofu í veskinu var greiðslukort, ökuskírteini og reiðufé.
Laust eftir níu í gærkvöldi var tilkynnt um slys á Víkurvegi í Grafarvogi. Ekið var á mann sem kom sér sjálfur á Læknavaktina, með verki í olnboga en óbrotinn þó. Hann var úti að hlaupa er óhappið varð og ökumaðurinn segist ekki hafa séð manninn.
Um hálf ellefu í gærkvöldi var tilkynnt um þjófnað á farsíma á veitingastað við Laugaveg í Reykjavík. Kona sem grunuð er um þjófnaðinn er einnig grunuð um fjársvik þar sem hún yfirgaf staðinn án þess að greiða fyrir veitingar sem hún hafði fengið.
Rétt fyrir klukkan eitt í nótt var ökumaður stöðvaður í Árbæ grunaður um akstur undir áhrifum fíkniefna. Um hálf fjögur í nótt var ökumaður stöðvaður í miðbæ Reykjavíkur. Hann reyndist aðeins vera sextán ára og því án ökuréttinda. Tveir farþegar voru í bílnum, en þeir voru einnig sextán ára. Málið var tilkynnt til Barnaverndar og afgreitt með foreldrum barnanna.