Íslendingur sem býr í aðeins fimm kílómetra fjarlægð frá H10 Costa Adeje Palace hótelinu, þar sem sjö Íslendingar eru í sóttkví vegna COVID-19 veirunnar, og fjórir gestir á hótelinu hafa sýkst af henni, segir að þetta ástand hafi lítil áhrif á daglegt líf á Tenerife. Það gangi sinn vanagang.
Hannes Guðmundsson starfar í fjarvinnslu sem lögfræðingur og leigir frá sér eina íbúð á Tenerife. „Ég verð ekki var við neitt stress hjá innfæddum varðandi Covid veiruna. Hér er t.d enginn með grímur og ekki hefur verið frestað neinum atburðum, t.d. núna er í gangi karnival í Santa Cruz og mikil fjöldi fólks tók þátt í hátíðinni. Framundan er karnival í Los Cristianos og hafa yfirvöld hér ákveðið að hátíðin muni fara framm enda séu þetta eins og er örfá afmörkuð tilfelli. Lífið gengur því sinn vanagang hér,“ segir Hannes.
Meðfylgjandi mynd er frá kjötkveðjuhátíðinni sem Hannes greinir frá.