„Hér höfum við fengið gos sem sendir hraun í báðar áttir, sem þýðir að þá skerum við af hluta skagans frá Reykjavíkursvæðinu og samskipti okkar meðan á eldgosi stendur og hraun renna yrðu þá á ferjum,“ segir Ármann Höskuldsson, rannsóknarprófessor í eldfjallafræði við HÍ í viðtali við Sjónvarpsþáttin Kveik sem sýndur verður á RÚV í kvöld.
„Ef það verður gos, þá verður hugsanlega af því gjóskufall. Það myndast hraun sem fer yfir landsvæði og mun skemma allt sem á vegi þess verður. Svo er móða, brennisteinsmóða, hversu mikil hún er og útbreidd, það fer eftir stærð gossins. Bæði gjóskufall og móða geta valdið verulegum truflunum á lífi fólks á Stórreykjavíkursvæðinu, í Keflavík, Þorlákshöfn, jafnvel á Selfossi og því svæði,“ segir Þorvaldur Þórðarson eldfjallafræðingur í sama þætti.
Í þættinum kemur fram að framundan gæti verið nýtt eldvirknitímabil á Reykjanessksaga með síendurteknum eldgosum á þessu þéttbýlasta svæði landsins.
Undanfarið hafa verið miklir jarðskjálftar á svæðinu og töluverð kvikusöfnun við fjallið Þorbjörn skammt frá Grindavík. Sérfræðingar telja þó ólíklegt að gos sé á næsta leiti.