Landsréttur staðfesti í dag sekt Hafsteins Oddssonar sem geranda í líkamsárás sem átti sér stað í Vestmannaeyjum árið 2016. Árásin vakti mikinn óhug en konan fannst illa útileikin eftir árásina. Fannst hún utandyra um miðja nótt, nakin, og líkamshiti hennar var rétt rúmlega 35 gráður. Auk líkamsárásarinnar var Hafsteinn sakfelldur fyrir blygðunarsemisbrot með því að hafa afklætt konuna og skilið hana eftir nakta.
Hafsteinn sparkaði og kýldi konuna í andlit og búk áður en hann afklæddi hana og skildi hana eftir nakta á víðavangi.
Áverkar á konunni voru brot í gólfi hægri augntóftar, mar og mjúkpartabólgur á augn- og kinnsvæðum, opinn skurður fyrir ofan vinstra auga sem sauma þurfti saman með fimm sporum, mar á nefi og höku, blóðnasir og blóð í munni, skrapsár aftan á hnakka, roði og skrapsár yfir brjósthrygg, roði og eymsli ofarlega á vinstri rasskinn og ofkæling.
Hafsteinn hefur ávallt neitað sök í málinu og við áfrýjun hans voru sönnunargögn véfengd en þau voru meðal annars ljósmyndir af konunni á vettvangi sem þykja ekki í miklum gæðum. Einnig fundust blóðleifar á skó Hafsteins sem DNA-greining leiddi í ljós að væru úr konunni.
Landsréttur hafnaði röksemdum Hafsteins og staðfesti sekt hans í málinu. Hins vegar var dómur héraðsdóms mildaður. Fangelsisrefsing var lækkuð úr sex árum niður í fjögur ár. Miskabætur til konunnar voru lækkaðar úr 3,5 milljónum niður í 2 milljónir króna.