Um klukkan hálf ellefu í gærkvöldi var tilkynnt um þjófnað úr verslun í Álfheimum. Meintur þjófur komst undan á reiðhjóli en var handtekinn skömmu síðar. Hann gaf ítrekað upp ranga kennitölu. Auk þess er hann grunaður um brot á sóttvarnarlögum en hann átti að vera í sóttkví. Hann var vistaður í fangaklefa.

Á sjötta tímanum í gær höfðu lögreglumenn í Kópavogi afskipti af pari í annarlegu ástandi. Konan er grunuð um að hafa ekki hlýtt fyrirmælum um að fara í sóttkví. Hún var færð til sýnatöku og síðan að dvalarstað hennar.

Á fimmta tímanum í nótt voru fjórir menn handteknir, grunaðir um innbrot í fyrirtæki í Ármúla. Þeir voru vistaðir í fangageymslu.

Á sjöunda tímanum í gær var maður staðinn að þjófnaði úr verslun í Hlíðarhverfi. Hann hlaut minniháttar áverka í átökum við starfsmann verslunarinnar. Ástands mannsins var ekki gott vegna áfengis- og fíkniefnaneyslu.

Á tíunda tímanum voru afskipti höfð af konu sem er grunuð um þjófnað úr verslun á Grandanum.

Einn ökumaður var handtekinn í nótt, grunaður um að vera undir áhrifum fíkniefna.

Síðdegis í gær var tilkynnt um innbrot í Grafarholti. Þar var farið inn í fokhelt hús og verðmætum stolið. Í Mosfellsbæ var tilkynnt um innbrot í geymslu. Þaðan var stolið sjónvarpi, fartölvu og fleiru.