Margrét Kristmannsdóttir, framkvæmdastjóri Paff, er í viðtalsþættinum Okkar á milli á RÚV í kvöld.
Þar ræðir Margrét meðal annars um skattsvik. Í pistli í Fréttablaðinu um daginn sagði Margrét:
„Hvernig stendur á því að fólki finnst það bara eðlilegt að í mína verslun komi fólk með þykkt umslag af peningum til að kaupa kannski vörur fyrir milljón.“
Margrét er andsnúin notkun á reiðufé og þekkir mörg dæmi um að fólk hafi greitt fyrir vörur og þjónustu með reiðufé fyrir mjög háar upphæðir.
„Ég heyrði til dæmis um einn sem er að reka fyrirtæki og það kom maður inn til hans sem vantaði glugga í húsið sitt. Gluggarnir áttu að kosta sex og hálfa milljón,“ segir hún. Maðurinn vildi fá að borga með reiðufé en var neitað. Þessi aðili sagði nei, ég ætla ekki að taka við reiðufé. En maðurinn fór og ég get lofað þér að húsið hans er ekki gluggalaust í dag,“ segir Margrét í þættinum á RÚV.
Margrét vill að löggjafinn geri verslunareigendum kleift að neita slíkum viðskiptum með því að setja eitthvert hámark á viðskipt í reiðufé: „Ég vil að löggjafinn gefi okkur í versluninni tæki og tól til að segja: Ef þú ætlar að koma til mín og versla fyrir meira en 100 þúsund eða bara 50 þúsund eða hvaða tölu sem er þá bara verður það að gerast með rafrænum hætti. Það á ekki að vera hægt að fólk labbi um með útttroðin umslög og skjalatöskur með peningum. Það vita allir sem vilja vita að 99,9% af þessum peningum eru svartir peningar. Við skulum ekkert vera að halda neitt annað. Þetta þurfum við að fá upp á yfirborðið því ríkissjóður þarf þetta, sveitafélögin þurfa þetta og við þurfum bara að ná í þessa peninga með hörku,“ segir Margrét ennfremur í þættinum.