Heildarfjöldi farþega hjá flugfélaginu Icelandair var í mí á þessu ári rúmlega þrjú þúsund samanborið við 419 þúsund í maí á síðasta ári. Þetta er um 99 prósent samdráttur á milli ára. Heildarframboð minnkaði um 98 prósent milli ára. Eins var 77 prósent samdráttur ár fjölda farþega hjá Air Iceland Connect á milli ára. Þetta kemur fram í tilkynningu frá Icelandair.  Samdráttur var þó minni í fraktflugi.

„Það er ánægjulegt að sjá útsjónarsemi og dugnað starfsfólks þvert á fyrirtækið við að grípa þau tækifæri sem gefist hafa í þeirri stöðu sem nú ríkir í alþjóðaflugi. Við höfum tekið að okkur sérverkefni á sviði fraktflutninga- og leiguflugs, sem eru óvenjuleg og flókin í útfærslu, en allir hafa lagst á eitt að leysa. Árangurinn endurspeglast í flutningatölum maímánaðar þar sem leigu- og fraktflug dróst einungis saman um 20% á milli ára á meðan farþegaflug til og frá Íslandi og tengiflug yfir hafið voru í algjöru lágmarki,“ er haft eftir Boga Nils Bogasyni, forstjóra Icelandair Group til tilkynningu.

Samdráttur í fraktflugi var aðeins um 20 prósent milli ára og var samdrætti í farþegaflugi mætt með aukaferðum af fraktvélum félagsins til Evrópu og Bandaríkjanna.

„Þannig hefur félagið náð að tryggja útflutning og verðmæti sjávarafurða og annarra útflutningsvara og flutt inn nauðsynjavörur til Íslands,“ segir í tilkynningu.

„Nú sjáum við fram á að markaðir séu að opnast fyrir farþegaflug á ný og við vonumst til að geta hafið daglegt flug til nokkurra lykiláfangastaða eftir 15. júní. Við erum tilbúin að bregðast hratt við um leið og ferðatakmörkunum verður aflétt og eftirspurnin tekur við sér,“ er haft eftir Boga.