„Ég er búinn að vera í einn og hálfan mánuð á Teslu. Þegar allt var að verða vitlaust vegna kórónuveirufaraldursins var ég að leysa bílinn út. Það fóru að renna á mig tvær grímur, ég verð að viðurkenna það,“ segir Gunnlaugur Ingvarsson, leigubílstjóri hjá Hreyfli, sem er annar af tveimur bílstjórum fyrirtækisins sem keyrir um á Teslu. Þegar vinnan minnkaði hjá leigubílstjórum ákvað Gunnlaugur að láta slag standa og skipti Skoda út fyrir Teslu. Gunnlaugur hefur áður verið áberandi í þjóðlífinu en hann er formaður Frelsisflokksins.

Gunnlaugur sér ekki eftir ákvörðuninni. Hann er mjög ánægður með bílinn og farþegarnir eru himinlifandi. „Farþegarnir eru rosalega ánægðir að keyra um í algjörlega hljóðlátum bíl. Hann er svo nýtískulegur og fólk talar oft um að þetta sé eins og að stíga um borð í geimskip.“

Bíllinn sem um ræðir er Tesla Model 3 sem er fjórhjóladrifinn rafmagnsbíll. Samkvæmt Gunnlaugi er hagkvæmt að keyra um á Teslu. „Rafmagnið er ódýrara en eldsneytið og mér sýnist rekstrarkostnaður líka vera minni. Það þarf hvorki að fara í smurningu né skipta um bremsuklossa.“ Hleðslan á bílnum dugar vaktina sem er í 10 til 12 tíma. „Áður fyrr var þetta ekki hægt vegna þess að rafmagnsbílarnir héldu ekki út vaktina. Ég get farið alveg norður á Akureyri og þess vegna hringinn. Það er verið að setja upp hraðhleðslustöðvar út um allt. Þetta er framtíðin“ segir Gunnlaugur.

Einkanúmerið TEZLA prýðir bíl Gunnlaugs. „Ég var nú eiginlega alltaf á móti einkanúmerum en svo fannst mér þetta bara svolítið smart, þetta lítur bara vel út og fólki finnst þetta smart.“ Vinsældir bílsins eru strax farnar að segja til sín. „Um helgina hópaðist unga fólkið um Tesluna og vildi bara koma inn þó svo að bíllinn minn væri fjórði eða fimmti í leigubílaröðinni.“ Hafi fólk áhuga á að fá far með Teslu er hægt að hringja í Hreyfil og biðja sérstaklega um Teslu.