Tæpar fjórar milljónir hafa safnast fyrir Kvennaathvarfið með áheitum á Facebook síðustu daga. Fjöldi fólks hefur deilt færslum þar sem vakin er athygli á aukningu á tilkynningum til lögreglu vegna heimilisofbeldis að undanförnu og þeirri staðreynd að tvær konur hafa látið lífið nýlega þar sem grunur er um heimilisofbeldi. Í færslunni segist fólk ætla að leggja inn á reikning Kvennaathvarfsins ákveðna upphæð fyrir hvert „læk” og hverja athugasemd sem færslan fær. 

Sigþrúður Guðmundsdóttir, framkvæmdastjóri Kvennaathvarfsins, greinir frá því á Facebook að mun meira hafi safnast en hún hafi reiknað með. „Ég hugsaði með mér að ef heppnin yrði með fengjum við kannski einhver hundruð þúsunda og ég hlakkaði til að fylgjast með samstarfssnillingunum mínum gera stofuna huggulegri og barnvænni og kvenvænni og kósí. Nema hvað, það söfnuðust nærri fjórar milljónir og nú getum við gert gjörvalt athvarfið krakka-og kvenvænna og kósí,” segir hún og þakkar öllum sem hafa tekið þátt. „Ég hlakka til að sýna ykkur myndir af herlegheitunum,” segir Sigþrúður. 

Meðal þeirra sem hafa lagt söfnuninn lið er Eva Laufey Kjaran matgæðingur, Páll Óskar Hjálmtýsson tónlistarmaður og Katrín Oddsdóttir lögmaður. Elísabet Ronaldsdóttir kvikmyndagerðarkona sem í forsíðuviðtali DV segir frá dvöl sinni í Kvennaathvarfinu með sonum sínum tók einnig þátt í átakinu.

Enn er hægt að leggja inn á reikning Kvennaathvarfsins:

Kennitala 410782-0229

Reikningur 101-26-43227