Landsréttur hafnaði í gær kröfu móður um að úrskurður barnaverndar þess efnis að sonur hennar skyldi vistaður utan heimilis í tvo mánuði yrði ógiltur. Var um að ræða staðfestinu á samhljóða dómi Héraðsdóms Reykjavíkur frá 6. apríl síðastliðnum.
Fram kemur í dómi héraðsdóms að málið á sér langa forsögu. Yfir 40 tilkynningar vegna sonar konunnar bárust barnavernd, sú fyrsta er hann var sex mánaða gamall, en drengurinn er núna á unglingsaldri. Þann 4. febrúar síðastliðinn úrskurðaði barnavernd Reykjavíkur að drengurinn skyldi vistaður utan heimilis í tvo mánuði og höfðaði móðirin mál vegna þess úrskurðar.
Í dómi héraðsdóms segir að tilkynningar vegna drengsins varði vanrækslu, ofbeldi á heimili og áhættuhegðunar. Móðirin sögð hafa ítrekað misst stjórn á skapi sínu á fundum með starfsmönnum barnaverndar, öskrað og brotið allt og bramlað á starfsstöð barnaverndar. Lögregla var einu sinni kölluð á svæðið og handtók hana.
Barnavernd fullyrðir ennfremur fyrir dómi að móðirin hafi ógnað starfsmönnum barnaverndar og birt trúnaðarupplýsingar um son sinn opinberlega. Hún hafi gert starfsmenn barnaverndar að umtalsefni í færslum og myndböndum á netinu, haft í hótunum, birt af þeim myndir og jafnvel gengið svo langt að birta myndir af börnum þeirra. Þá hafi hún birt myndir og myndbönd af syni sínum í tengslum við meðferð máls hans og hafi þetta valdið honum vanlíðan. Í einu tilviki hafi móðirin birt mynd af syninum sem hafi komið honum í sýnilegt uppnám. Í bréfi sem móðirin fékk frá opinberum aðila þann 20. mars segir að „birting sóknaraðila sé gróft brot gegn réttindum drengsins enda sé birtingin ekki með hans leyfi og geti haft verulega slæm áhrif á drenginn og valdið skaða sem erfitt kann að vera að bæta.“
Sonur konunnar er sagður vera í grunninn flottur unglingsstrákur sem sé virkur í íþróttum en hafi einnig glímt við ýmis vandamál sem ekki hafi verið meðhöndluð með fullnægjandi hætti af fagaðilum.
Í niðurstöðu héraðsdóms er fullyrt að drengurinn hafi horfið fyrirvaralaust úr skóla vorið 2018 án þess að móðirin gerði neina grein fyrir fjarveru hans, en hann birtist síðan aftur á skólalóðinni í desember sama ár, hafði hann dvalist erlendis með móður sinni. Árið 2019 tilkynnti móðirin síðan að drengurinn væri hættur í skóla og fór með hann úr landi. Mætti hann síðan í skólann aftur í maí 2019 og mætti eftir það eftir hentugleika. Hafi nám hans verið mjög takmarkað og móðirin ekki samstarfsfús.
Í málsrökum sínum fullyrti móðirin að barnavernd hefði staðið fyrir því að lögregla réðst með valdi inn á heimili hennar í febrúar á þessu ári og fjarlægði börn hennar nauðug af heimilinu, þar á meðal soninn sem hér er umfjöllunarefni. Hafi lögreglumenn haldið móðurinni niðri og börnin þurft að horfa upp á hana í þeim aðstæðum. „Þau hafi upplifað sig varnarlaus og hrædd í þessum aðgerðum lögreglu. Engin ástæða hafi verið til svo harkalegra aðgerða þegar engin óregla hafi verið til staðar á heimilinu og börnin ekki í bráðri hættu af því að vera á heimili sóknaraðila,“ segir í texta dómsins um þetta.
Sem fyrr segir var kröfum móðurinn hafnað bæði fyrir héraðsdómi og Landsrétti og úrskurður barnaverndar frá 11. febrúar 2020, um vistun drengsins utan heimilis, staðfestur. Málskostnaður var felldur niður og gjafsóknarkostnaður móðurinnar greiddur úr ríkissjóði.
