Landsréttur hefur ógilt dóm Héraðsdóms Reykjavíkur frá 2. apríl er ákæru gegn Skúla Gunnari Sigfíssyni, sem ávallt er kenndur við Subway, og tveggja viðskiptafélaga hans, þeirra Guðmundar Hjaltasonar og Guðmundar Sigurðssonar, var vísað frá.

Meðal annars var ákært fyrir millifærslur af reikningi félagsins EK1923 inn á reikning Stjörstjörnunnar, félags í eigi Skúla, dagana áður en félagið fór í þrot. Upphæðin var 21,3 milljónir króna. Aðrir liðir ákærunnar snerist um framsal á kröfu á hendur ríkinu vegna úthlutunar á tollkvóta og greiðslur frá árinu 2016 til tveggja erlendra birgja.

Sá sem kærði í málinu var skiptastjóri þrotabús EK1923, Sveinn Andri Sveinsson lögmaður.

Héraðsdómur vísaði ákæru í málinu frá á þeim forsendum að með færslu fjármuna í félaginu „samkvæmt lýsingu í ákæru hefði hvorki verið skertur nokkur sérstaklega tryggður réttur né hefði árangurslaus  aðfarargerð  fylgt  í  kjölfarið,  sbr. fyrirmæli  3. mgr. 250. gr. laganna. Ekki væru skilyrði til útgáfu ákæru um brot á ákvæðinu nema fyrir lægi refsikrafa þess sem teldi misgert við sig.“ Taldi héraðsdómur að ekki lægi fyrir að sá sem hefði átt að verða fyrir misgjörðinni hefði kært málið þar sem kæran barst frá skiptastjóra, Sveini Andra Sveinssyni.

Landsréttur er þessu ósammála og telur nægileg tengsl vera milli gjaldþrotaskiptanna og þeirrar háttsemi sem kært var fyrir: „Landsréttur taldi að árangurslaust fjárnám og úrskurður um gjaldþrotaskipti hefði  staðið í nægilegum tengslum í tíma við þá háttsemi sem ákært var fyrir til að teljast hafa fylgt á eftir henni í skilningi  3. mgr. 250. gr. almennra hegningarlaga.“

Úrskurður héraðsdóms er því felldur úr gildi og lagt fyrir héraðsdóm að taka málið til efnismeðferðar.

Úrskurður Landsréttar féll á þriðjudag en hann má lesa hér. Athygli vekur að bæði sá dómur og dómur héraðsdóms eru nafnhreinsaðir en slíkt tíðkast yfirleitt bara í mjög viðkvæmum málum, t.d. málum er snerta börn eða kynferðisbrot, en ekki í málum sem snerta fjármáladeilur eða meint fjársvik, eins og þetta mál.