Um klukkan 23 í gærkvöldi höfðu lögreglumenn afskipti af starfsemi veitingastaðar í miðborginni vegna brots á samkomubanni. Þar voru rúmlega 30 manns samankomnir en samkvæmt gildandi reglum um fjöldasamkomur mega að hámarki 20 manns koma saman hverju sinni.

Skömmu fyrir klukkan eitt í nótt höfðu lögreglumenn afskipti af starfsemi annars veitingastaðar, í Bústaðahverfi, en þar voru rúmlega 30 manns inni.  Einnig hefði átt að loka staðnum klukkan 23. Í tilkynningu frá lögreglunni segir að grunur leiki á að brotið hafi verið gegn reglum um fjöldasamkomu og reglum lokun samkomustaða og starfsemi vegna sérstakrar smithættu.