Flestir Íslendingar geta verið sammála um að það eru nokkrir hlutir sem eru hreinlega ómissandi þegar kemur að því að halda heilög jól. Er hægt að hugsa sér jólin án þess að sötra malt og appelsín, finna ilminn af hangikjöti og liggja undir teppi með nýjustu bókina hans Arnaldar, með konfektskál á kantinum? DV lagði upp í lauslega verðkönnun á þessum hlutum og afraksturinn má sjá hér.
Malt og appelsín er ómissandi á jólunum og ekki er verra þegar hægt er kaupa blönduna tilbúna. Ein hálfs lítra dós af blöndunni reyndist ódýrust í Bónus en dýrust í verslun Hagkaupa.
Bónus –187 kr
Krónan – 188 kr
Nettó –191 kr
Hagkaup –229 kr
Þá er það Nóa-konfektið sívinsæla, en eins og gefur að skilja er það fáanlegt í mismunandi söluumbúðum. Hér er miðað við verð á einu kílói. Slíkar pakkningar reyndust fáanlegar í verslun Hagkaupa og Krónunnar en í verslun Nettó var hægt að fá 800 gramma pakkningu og í verslun Bónuss var hægt að fá 1,2 kílóa pakkningu. Sé miðað við verð á einu kílói þá er ljóst að Bónus hefur vinninginn.
Nettó – 3.469 (800 g) (4.336 kr/kg)
Bónus – 3.975 (1,2 kg) (3.312 kr/kg)
Krónan – 3.659 krónur (1 kg)
Hagkaup – 3.699 krónur (1 kg)
Hangikjötsilmurinn einn og sér nægir til að vekja upp minningar frá bernskujólum og það er ekki hægt að neita því að fátt minnir meira á íslensk jól. Hér er miðað við verð á úrbeinuðu hangikjötslæri.
Nettó – KEA hangilæri, úrbeinað ca. 900 g: 3.320 kr
Hagkaup – ÍL Hátíðarhangikjöt, birkireykt úrbeinað: 3.089 kr/kg
Krónan – SS birkireykt hangikjöt, úrbeinað: 3.699 kr/kg
Bónus – ÍL Hátíðarhangikjöt, birkireykt úrbeinað: 2.998 kr/kg
Bækur eru sívinsæl jólagjöf á meðal Íslendinga og líkt og fyrri ár trónir Arnaldur Indriðason á toppnum með spennusöguna Tregastein. Flestar matvöruverslanir taka þátt í jólabókaflóðinu en athygli vekur þó að Krónan tekur ekki þátt í jólabókaflóðinu í ár.
Bónus – 4.498 kr
Nettó – 5.249 kr
Hagkaup 4.999 kr
Krónan – Ekki í boði
