Bæjaryfirvöld í litlum sjö þúsund manna bæ í Quebec í Kanada ætla að skipta um nafn á bænum. Ástæðan er kannski skiljanleg enda dregur bærinn nafn sitt af stærstu asbestnámu heims sem er í nágranni við bæinn.
Um sjö þúsund manns búa í bænum sem heitir einfaldlega Asbestos. Á sínum tíma voru bæjaryfirvöld stolt af auðlindinni við bæinn en í seinni tíð hefur nafnið orðið þyrnir í augum bæjarbúa og það af skiljanlegri ástæðu. Asbest var vinsælt einangrunarefni í húsum á sínum tíma en nú er það bannað víðast hvar í heiminum.
Asbest samanstendur af fíngerðum kristölum sem geta valdið miklu tjóni við innöndun. Skaðinn kemur oft ekki fram fyrr en eftir langan tíma, 20-40 ár, og þá sem steinlunga, lungnakrabbamein eða fleiðrukrabbamein eins og fjallað er um á Vísindavefnum.
Bæjaryfirvöld segja að á undanförnum árum hafi reynst ómögulegt að fá einstaklinga til að stunda fjárfestingar á svæðinu. Hugues Grimard, bæjarstjóri Asbestos, bendir á í samtali við BBC að námunni hafi verið lokað árið 2012 og síðan þá hafi yfirvöld leitað leiða til að fá fyrirtæki á svæðið. Það hafi reynst þrautin þyngri því fyrirtækjum sé hreinlega illa við nafnið, Asbestos.
Tilkynnt verður um nýtt nafn á nýju ári en þangað til eru íbúar hvattir til að koma með hugmyndir.