Gunnhildur Gunnarsdóttir sagði frá erfiðri reynslu sinni úr íslenska heilbrigðiskerfinu í útvarpsþættinum Bítinu á Bylgjunni, í morgun.

Gunnhildur segir að það hefði tekið mjög langan tíma fyrir lækna að komast að því hvað væri að hjá henni, en á tímabili var hún hjá sjúkraþjálfara þrisvar sinnum í viku. Að lokum hitti Gunnhildur þó lækni sem hún segir að hafi skoðað röntgen-myndirnar vel.

Læknirinn sagði henni þá að vandamálið væri í beinunum, sem enginn hafði bent á áður. Nú hefur Gunnhildur komist að því að hún þarf að fara í mjaðmaskiptiaaðgerð á báðum mjöðmum. Hins vegar er biðtíminn í aðgerðina ansi langur, en henni var sagt að bíða í nokkra mánuði.

„Næstu mánuðir, hvað þýðir það? Eru það tveir mánuðir eða tíu mánuðir? Þannig að ég hringi á sjúkrahúsið. Ég fór bara að grenja og það var bara ósjálfrátt. Mig verkjar allan daginn. Ég meina, hvað þýðir þetta?“

„Ég er loksins komin með einhverja lausn, en núna þarf ég bara að bíða og bíða og bíða,“

Gunnhildur lýsti einnig verkjunum sem hún finnur fyrir og hvernig þeir hamla henni

„Ég man ekki hvenær ég svaf heila nótt síðast. Ég vakna hverja einustu nótt útaf verkjum. Það er bara þannig, ekki einu sinni heldur nokkrum sinnum.“

Gunnhildur sagði einnig frá því er hún fór með börnum sínum að sníkja nammi á hrekkjavökunni. Sú ferð endaði ekki vel, því svo fór að hún þurfti að fá móður vina barna sinna til að skutla sér heim vegna verkja. „Ef ég er mjög þreytt þá get ég ekki labbað,“ segir Gunnhildur.