Átján blaðamenn á vefmiðli Morgunblaðsins eru svekktir með ritstjóra sína og lausapenna sem kallaðir voru til að ganga í störf á meðan vefblaðamenn lögðu niður vinnu frá klukkan 10-14 í dag. Þetta var gert í samræmi við tímabundna vinnustöðvun blaðamanna á netmiðlum sem samþykkt var í atkvæðagreiðslu félagsmanna Blaðamannafélags Íslands til áréttingar kröfum félagsmanna í Blaðamannafélaginu í kjaradeilu félagsins við Samtök atvinnulífsins. Verkfallsverðir fylgdust með því að ekkert efni væri sett á vefmiðla þeirra fjölmiðla sem stóðu í verkfallinu í þessa fjóra tíma.
Jón Pétur Jónsson fréttastjóri Mbl.is og Víðir Sigurðsson, yfirmaður íþróttadeildar Morgunblaðsins, eru á meðal þeirra sem skrifa undir yfirlýsingu sem birt var ávef Blaðamannafélagsins en þar segir að umræddu fréttaskrifin voru með vitund og vilja ritstjóra og framkvæmdastjóra Morgunblaðsins.
„Við undirrituð blaðamenn og fréttastjórar á frétta- og íþróttadeild mbl.is lýsum yfir vonbrigðum með þetta framferði og þau viðhorf til löglega boðaðra aðgerða sem þarna birtast. Við teljum að þetta framferði sé til þess fallið að varpa rýrð á mbl.is, ekki síst þá blaðamenn sem þar starfa og leitast eftir fremsta megni við að sinna starfi sínu af heilindum og fagmennsku. Að okkar mati er þetta síst til þess fallið að finna vænlega lausn á kjaradeilunni sem nú stendur yfir,“
segir í yfirlýsingunni, en undir hana skrifa:
Anna Sigríður Einarsdóttir, Anna Lilja Þórisdóttir, Arnar Þór Ingólfsson, Erla María Markúsdóttir, Freyr Bjarnason, Guðmundur Hilmarsson, Guðrún Hálfdánardóttir, Hallur Már Hallsson, Ívar Benediktsson, Jóhann Ólafsson, Jón Pétur Jónsson, Kristján Jónsson, Sindri Sverrisson, Sólrún Lilja Ragnarsdóttir, Víðir Sigurðsson, Þorgerður Anna Gunnarsdóttir, Þorsteinn Ásgrímsson Melén og Þórunn Kristjánsdóttir.