Greint var frá málinu í kvöldfréttum Stöðvar 2 í kvöld. Þar er sagt frá því að mennirnir geti setið við tölvuna og pantað brot á börnum í gegnum netið. Börnin eru þá gjarnan stödd hinum megin á hnettinum. Ekki nema sjö danir hafa verið dæmdir fyrir brotin en þar af eru 5 á síðasta ári.
Rætt var við Karl Steinar Valsson, yfirlögregluþjón hjá miðlægri rannsóknardeild lögreglunnar, en hann segir lögregluna líta á þessi brot með mjög alvarlegum augum.
„Þú getur óskað eftir tilteknu broti og selt aðgang að því. Þessu er streymt í gegnum netið á sama tíma og þetta á sér stað,“
Fram kemur í umfjöllun Stöðvar 2 um málið að flestir mannana sem panti brotin búi í Evrópu en flest börnin sem verða fyrir brotunum búa í Asíu. Lögreglan hér á landi rannsakar það núna hvort það séu einhverjir Íslendingar sem hafa gerst sekir um þessi brot.
„Við höfum fengið ábendingar frá erlendum aðilum um að Íslendingar séu að tengjast inn í margs konar brot sem eru á netinu. Þannig að það er ástæðan fyrir því að við viljum stíga meira inn í þessa rannsókn,“
Eins og áður segir fara brotin fram á netinu en þó á sérstöku hulduneti. Brotin eru sögð sérstaklega gróf enda geta þeir sem panta brotin falið sig á bakvið tölvuskjáinn í tugþúsunda kílómetra fjarlægð frá barninu sem verið er að brjóta á.
Rannsókn á kynferðisbrotum á Íslandi hefur verið breytt undanfarið vegna nýrra leiða barnaníðinga en algengt er að þeir athafnist í gegnum netið. Karl Steinar sagði lögregluna ekki hafa horft á þessi mál með nægilega alvarlegum augum.
„Við höfum ekki verið að sinna þessu og ekki horft á þetta nægilega alvarlega augum. En við höfum áhuga á að breyta því,“