Tilkynnt var um innbrot og þjófnað í Kópavogi á níunda tímanum í gærkvöldi og er þjófurinn talinn hafa haft á brott með sér reiðhjól. Ekki var um neitt venjulegt reiðhjól að ræða, að sögn lögreglu, því andvirði þess er um 500 þúsund krónur.
Þetta kemur fram í dagbók lögreglu um verkefni gærkvöldsins og næturinnar. Ekki kemur fram hvort þjófurinn hafi náðst eða hvort einhver sé grunaður um verknaðinn.
Rétt fyrir klukkan 23 í gærkvöldi var tilkynnt um innbrot í íbúð í Árbænum. Þar hafði hurð verið sparkað upp, farið inn og verðmætum stolið. Þá voru þrír ökumenn stöðvaðir í gærkvöldi, tveir vegna gruns um akstur undir áhrifum fíkniefna og einn vegna ölvunaraksturs.