Costco er komið til að vera á Íslandi, segir Már Wolfgang Mixa, lektor við viðskiptafræðideild Háskóla Íslands, í samtali við Viðskiptablaðið í dag. Blaðið fjallar um afkomu Costco en samkvæmt nýbirtum ársreikningi Costco á Íslandi velti fyrirtækið 21,2 milljörðum króna á síðasta rekstrarári, frá 1. september 2017 til 31. ágúst 2018.
„Þetta er brjálæðisleg velta,“ segir Már sem bætir við að áhugavert verði að sjá afkomuna á næsta rekstrarári. „Það kæmi mér á óvart ef þeir væru ekki komnir með rekstrarhagnað,“ segir hann en á síðasta rekstarári skilaði Costco 316 milljóna króna rekstarhagnaði fyrir afskriftir og fjármagnsliði en 47 milljóna tapi að teknu tillite til afskrifta.
Þá er bent á það að handbært fé Costco hafi verið 1,8 milljarðar króna í lok síðasta rekstrarárs, en það nemur 8 prósentum af sölutekjum sem er fremur mikið. Már segir við Viðskiptablaðið að nærtækasta skýringin á þessu sé sú að Costco hafi viljað hafa digran varasjóð til að geta tekist á við óvænta atburði eða ef áætlanir félagsins hér á landi gengju ekki eftir.