Ökumaður sem gómaður var á Reykjanesbraut af lögreglunni á Suðurnesjum á dögunum á von á 240 þúsund króna sekt og sviptingu ökuréttinda í þrjá mánuði. Bifreið mannsins mældist á 165 kílómetra hraða en þarna er 90 kílómetra hámarkshraði.
Alls hafa um 30 ökumenn verið kærðir fyrir of hraðan akstur í vikunni í umdæmi lögreglunnar á Suðurnesjum en umræddur ökumaður hér að ofan ók hraðast þeirra. Þá segir lögregla að óvenju margir ökumenn hafi verið staðnir að því að leggja bifreiðum sínum ólöglega eða að virða ekki stöðvunarskyldu.
Í skeyti frá lögreglu segir einnig af ungum pilti sem stöðvaður var á bifhjóli á Njarðvíkurbraut í fyrradag. Hann reyndist ekki hafa ökuréttindi á hjólið og þar sem hann var ekki orðinn 18 ára var forráðamönnum og barnavernd gert viðvart um málið. Þetta var í annað sinn sem lögregla hafði afskipti af piltinum af þessum sökum.