Líkt og DV greindi frá í dag var íslenskur maður handtekinn á flugvellinum Stafangri í Noregi, fyrir að hafa reynt að ráðast inn inn í flugstjórnarklefa á meðan flugi stóð. Atvikið átti sér stað í ungverskri farþegaþotu flugfélagsins Wizz air á leið frá Budapest til Keflavíkur. Vegna atviksins var vélinni lent í Stafangri í Noregi.

Maðurinn sem um ræðir er fyrrverandi landsliðsþjálfari og landsliðsmaður Íslendinga í handbolta, Þorbergur Aðalsteinsson. Hringbraut greinir frá þessu.

Þorbergur var á sinni tíð einn þekktasti handknattleiksmaður landsins en besta árangri sem landsliðsþjálfari náði hann þegar liðið undir hans stjórn varð  í fjórða sæti á Ólympíuleikunum 1992.

Fram kemur í ungverska fjölmiðlinum Hungary Today að Þorbergur hafi tjáð lögreglu að hann hafi tekið inn lyf og muni þess vegna ekkert eftir atvikinu.

Talið er að fréttir fyrr í dag þess efnis að Þorbergur hafi ætlað að fremja flugrán séu rangar. Hann er hins vegar talinn hafa verið í mjög annarlegu ástandi um borð í vélinni.