Myndband hefur verið birt á Facebook-síðunni Refugees in Iceland þar sem hælisleitandi tekur upp lögreglumenn sem komu, að hans mati, í heimildarleysi inn í herbergi hans á Ásbrú. Hælisleitandanum er heitt í hamsi og krefst þess að fá að vita hvers vegna lögreglumennirnir hefðu vaðið inn til hans á meðan hann svaf og  hver hefði gefið þeim heimild til þess.

„Ég var sofandi, vaknaði við að þrír lögreglumenn væru inn í herberginu og sögðust vera að leita að einhverju. Ég veit ekki hverju þeir eru að leita að. Það er engin ástæða. Hvert  er vandamálið?“

Lögreglan svarar:

„Við erum að leita að síma. Það var lítill strákur sem símanum var stolið frá. Við erum að leita í öllum herbergjum.“

Ljóst er að lögreglumennirnir eru komnir til að leita að síma 8 ára drengsins sem DV greindi frá fyrr í dag. Lögregla ræðir sín á milli um símann og hvort drengurinn geti borið kennsl á þjófinn. Hælisleitandinn segist vera lögfræðingur og að lögreglan hafi enga heimild til að vera að leita þarna. Lögregla segir að þeir séu að elta merki frá forritinu Find my iPhone, drengurinn hafi séð mynd af hælisleitandanum og fundist hann kannast við hann.

„Bara vegna þess að hér eru hælisleitendur, við höfum engin réttindi, ykkur er sama hver þau eru, þið leitið bara hér eins og við séum dýr. Hvernig opnaðirðu hurðina ég opnaði hana ekki fyrir þér“

Lögreglumennirnir tveir útskýra að þeir viti það ekki, aðrir lögreglumenn hafi komið þangað inn á undan þeim og því viti þeir ekki nákvæmlega hver opnaði hurðina.

„Þeir gáfu okkur leyfi til að leita  hér. Við verðum að leita í herbergjunum til að finna þennan síma,“ .

Lögregla fer þá að yfirheyra hælisleitandann um herbergisfélagann og tekur upp síma, líklega til að reyna að hringja í stolna símann sem þeir eru að leita að.

„Við erum búnir hér, afsakið að við þurftum að trufla þig, en við þurftum að gera þetta, þannig er það bara og nú erum við að fara.“

Í texta með myndbandinu á Facebook er greint frá því að lögregla hafi ólöglega leitað í herbergjum hælisleitenda og hvatt til mótmæla fyrir utan dómsmálaráðuneytið vegna þessa.

„Áhugavert er að lögregla leitaði aðeins í herbergjum þeirra sem hafa tekið þátt í mótmælunum að undanförnu.“