Þann 23. janúar tekur Hæstiréttur fyrir hið svokallaða „shaken baby“ mál en í því var Sigurður Guðmundsson dæmdur fyrir manndráp af gáleysi 2003. Hann var sakfelldur fyrir að hafa hrist 9 mánaða dreng, sem hann var með í daggæslu, með þeim afleiðingum að drengurinn lést. Fallist var á endurupptöku málsins 2015 en það vó þungt í þeirri ákvörðun að fyrir lá matsgerð bresks sérfræðings, dr. Wayne Squier, sem taldi dánarorsök drengsins óljósa og að engin ótvíræð gögn lægju fyrir um högg eða önnur merki um áverka sem hefðu getað orsakast af harkalegum hristingi.

Fréttablaðið skýrir frá þessu í dag. Ríkissaksóknari fer fram á að málinu verði vísað frá Hæstarétti og segir í kröfu sinni að Squier hafi verið ónákvæm og óábyrg sem dómkvaddur matsmaður. Svo virðist sem hún setji mat sitt fram í þeim tilgangi einum að rökstyðja eigin trú um að „shaken baby“ syndrome sé ekki til.

Squier er umdeild en hún var svipt lækningaleyfi í Bretlandi fyrir tveimur árum vegna meints misvísandi og óheiðarlegs vitnisburðar um dauðsföll barna fyrir breskum dómstólum. Hún fékk leyfið aftur síðar sama ár en má ekki bera vitni sem sérfræðingur fyrir breskum dómstólum í þrjú ár.

Fyrir Hæstarétti verður einnig lagt fram yfirmat tveggja annarra sérfræðinga sem báðir telja að drengurinn hafi látist af völdum höfuðáverka.