Útvarpsmaðurinn Frosti Logason fór mikinn í Harmageddon í morgun og gagnrýndi harðlega framkomu RÚV undanfarið. Hann telur mjög óeðlilegt að þegar kanadíski sálfræðingurinn Jordan Peterson kom til landsins á dögunum þá hafi RÚV haft lítinn áhuga á að ræða við hann, þrátt fyrir bók hans, 12 Rules for Life, sé metsölubók um víða veröld.

RÚV hafi þó sent yfirlýstan andstæðing Peterson á fyrirlesturinn. Af orðum Frosta að dæma þá telur hann pólitík hafa ráðið för hjá stofnun sem á að heita hlutlaus. Umræðan í Harmageddon hófst á því að bæði Frosti og Máni Pétursson ræddu mikilvægi þess að RÚV færi af auglýsingamarkaði.

„Það var eitt sem að RÚV gerði, þeir sendu mann á fyrirlestur Jordan Peterson til að fjalla um á Ríkisútvarpinu og veistu hvaða mann þeir sendu? Þeir sendu mann sem hafði skrifað þetta eftirfarandi þegar tilkynnt var að Jordan Peterson væri að koma til Íslands og miðasala væri að hefjast í nóvember. Þá skrifaði þessi maður:

„Þessi maður er að koma til Íslands bráðum. Hann ætlar að tala um eitthvað. Er ekki alveg viss um hvað hann ætlar að tala um. En Viðskiptablaðið hefur skrifað grein um að hann sé ötull talsmaður málfrelsis. Það er hann sannarlega ekki. Hann er auli og málpípa kryptófasista. Sýsifos mælir stranglega gegn því að mæta á fyrirlestur mannsins. Þessi grein útskýrir ágætlega vitsmunalega brandarann sem þessi maður er.““

Maðurinn sem Frosti vísar í heitir Karl Ólafur Hallbjörnsson og birtust ummælin á vefrit hans um heimspeki, stjórnmál og ritlist, Sýsifos. Hér má lesa pistil hans um fyrirlesturinn sem birtist á vef RÚV. „Þetta er sem sagt blaðamaðurinn sem RÚV ákveður að senda á fyrirlesturinn til að fjalla um í sínum miðli. Hugsaðu þér fagmennskuna. Hvað er í gangi?,“ sagði Frosti í morgun.

Þá sagði Máni: „Er stofnunin komin á einhvern mjög súran stað? Orðið eitthvað sérvaxið skrímsli sem þarf að fara að stoppa?“