Píratar mælast stærsti flokkur landsins og Framsóknarflokkurinn nýtur meira fylgis en Vinstri græn. Þetta kemur fram í nýrri könnun MMR sem mældi fylgi stjórnmálaflokka og stuðning við ríkisstjórnina. Könnun var framkvæmd dagana 20. til 26. September.

Helstu niðurstöður könnunarinnar eru að Píratar mælast með 21,6% fylgi og Sjálfstæðisflokkurinn 20,6%. Viðreisn mælist með 12,3% og hækkar um 3,5 prósentustig frá síðustu könnun í ágúst. Er þetta besti árangur flokksins hingað til.

Þá vekur athygli að Framsóknarflokkurinn sem hefur verið mikið til umræðu undanfarið vegna innbyrðisátaka er með 12,2% fylgi og mælist stærri enn bæði Vinstri græn (11,5%) og Samfylking (9,3%). Björt framtíð mælist nú með 4,9% fylgi og er hæsta mæling síðan í maí. Líklega má rekja þá hækkun til þess að þingmenn flokksins greiddu atkvæði gegn nýjum og umdeildum búvörusamningum og hlutu nokkuð lof fyrir.

Stuðningur við ríkisstjórnina er aðeins 31,5 prósent sem er það lægsta síðan í apríl.