Sennilega hafa fáir lagt jafn fjölbreytta hönd á plóg fyrir íslenskt íþróttalíf í vikunni og stórmeistarinn Margeir Pétursson. Það vakti undrun margra sem þekkja til afreka Margeirs við skákborðið og í viðskiptalífinu að sjá hann á varamannabekk íslenska landsliðsins í knattspyrnu kyrjandi íslenska þjóðsönginn fyrir leik Íslands og Úkraínu í Kiev á mánudagskvöldið.

Einstakt tækifæri til njósna

Ástæðan var úthugsuð flétta landsliðsþjálfarans Heimis Hallgrímssonar sem hvaða stórmeistari í skák yrði stoltur af. „Margeir er búinn að vera þarna úti um langt skeið og talar tungumál heimamanna. Þessi leikur var skrítinn að því leyti að engir áhorfendur voru á leiknum sökum banns sem úkraínska knattspyrnusambandið fékk vegna óláta áhorfenda í fyrri keppni. Því gafst einstakt tækifæri til þess að hlera hvað væri verið að ræða um á vellinum. Margeir sat við hliðina á Frey Alexanderssyni og sagði honum hvaða skipanir landsliðsþjálfari Úkraínu var að gefa og hvað væri verið að ræða um á bekknum,“ segir Heimir.

Heimir Hallgrímsson Íslenski landsliðsþjálfarinn er greinilega klókur með afbrigðum og greinir víða tækifærin.

Mynd: DV ehf / Sigtryggur Ari

Á síður von á sömu klækjum í Zagreb

Að sögn landsliðsþjálfarans eru aðstæður á vellinum yfirleitt þannig að leikmenn heyra varla hver í öðrum, hvað þá landsliðsþjálfaranum á hliðarlínunni. Í Kiev mátti hins vegar heyra saumnál detta. „Þetta var einfaldlega dauðafæri,“ segir Heimir og hlær. Svo einkennilega vill til að sömu aðstæður verða í Zagreb þegar íslenska landsliðið spilar gegn Króatíu. Þar verða áhorfendur ekki leyfðir á leikinn vegna agabanns FIFA. Heimir telur ólíklegt að sama verði uppi á teningnum í þeim leik. „Ég á síður von á því. Króatarnir finna alltaf einhverjar leiðir til þess að búa til hávaða og því finnst mér ólíklegt að það verði jafn hljóðlátt í Zagreb og var í Kiev,“ segir Heimir.

Margeir Pétursson Skákmeistarinn á vettvangi sem hann þekkir betur.

Fróðleiksfúsar í Bakú

Á sama tíma og íslenska knattspyrnulandsliðið lét til sín taka í Kiev þá stóðu íslensku skáklandsliðin í ströngu á Ólympíumótinu í skák sem fram fer í Bakú, höfuðborg Aserbaídsjan. Margeir hafði ráðgert að gera sér ferð þangað sem „skáktúristi“ og fylgjast með þessari stærstu skákhátíð heims. Hann breytti hins vegar áformum sínum þegar kallið kom frá KSÍ og hélt ekki til Bakú fyrr en daginn eftir knattspyrnuleikinn. Hann var varla búinn að koma sér fyrir uppi á hótelherbergi sínu þegar landsliðsþjálfari íslenska kvennalandsliðsins, Björn Ívar Karlsson, bað hann að ausa úr fróðleiksbrunni sínum til liðsmanna. Margeir varð glaður við því og gaf konunum ýmis heilræði á tveggja klukkustunda æfingu sem nýtast örugglega vel í framhaldinu.