Dauðsföll af völdum ofneyslu hættulegra lyfja hafa vakið umtal
Tónlistarmaðurinn Bubbi Morthens kemur rapparanum Gísla Pálma til varnar í kjölfar þeirrar umræðu sem átt hefur sér stað eftir að ungur maður lést á menningarnótt. Maðurinn féll frá með sviplegum hætti en grunur leikur á að hann hafi neytt fentanýls sem er rótsterkt lyfseðilsskylt verkjalyf í plástraformi.
Bubbi segir að Gísli Pálmi beri fyrst og síðast ábyrgð á sjálfum sér en ekki hvað aðrir gera. Að gefa það í skyn að hann beri ábyrgð á dauða unga mannsins sé ömurlegt.
Annar ungur maður var hætt kominn þetta sama kvöld og fór í hjartastopp en var bjargað. Fram hefur komið að mennirnir hefðu verið saman á veitingastaðnum Prikinu og væru báðir tengdir nokkuð þekktum tónlistarhópi.
DV greindi frá því þann 25. ágúst síðastliðinn að bjargvættur annars mannsins hefði verið tónlistarmaðurinn Gísli Pálmi og hefði hann hnoðað manninn um stund þar til sjúkraflutningamenn komu á vettvang, en þá tókst sjúkraflutningsmönnum að koma hjarta mannsins aftur af stað með hjálp hjartastuðtækis. Báðir mennirnir sem um ræðir voru meðlimir í Glacier Mafia sem er hópur í kringum Gísla Pálma sem stígur stundum á svið með honum og er oft áberandi í myndböndum tónlistarmannsins.
Þetta atvik hefur vakið umræðu um lífsstíl ungra tónlistarmanna á borð við Gísla Pálma, manna sem ungt fólk lítur jafnvel upp til. Í lögum sínum rappar Gísli Pálmi meðal annars um fíkniefni og neyslu þeirra. Hildur Lilliendahl vandaði Gísla Pálma til dæmis ekki kveðjurnar á Twitter-síðu sinni á dögunum.
Ég legg til að við sameinumst um að leggja niður Gísla Pálma hypeið.
— ♀Hildur Lilliendahl♀ (@hillldur) August 23, 2016
GP þarf að endurskoða líf sitt og aðdáendur að endurskoða aðdáunina. Fólk er að deyja. Hjálpar ekkert að blokka mig. pic.twitter.com/igi8CAJ3i3
— ♀Hildur Lilliendahl♀ (@hillldur) August 23, 2016
Þorvarður Helgason, faðir ungrar stúlku sem lést eftir neyslu á MDMA árið 2013, sagði í Fréttatímanum fyrir helgi að dauðsfall unga mannsins á menningarnótt veki hjá sér sorg fremur en reiði. Dóttir hans lést þegar hún var í teiti hjá Gísla Pálma.
Sjálfur sagðist Þorvarður ekki vera að leita að sökudólgi og að hann kenndi Gísla Pálma ekki um andlát dóttur sinnar. „Það er hinsvegar sorglegt að horfa á það þegar honum er hampað og hann verður óhjákvæmilega ákveðin fyrirmynd fyrir þessa krakka. Það er fullt af ungmennum innan við tvítugt sem hanga í honum og það getur verið óhugnanlegt,“ sagði Þorvarður í viðtalinu.
Helga Vala Helgadóttir lögmaður er ein þeirra sem hefur tjáð sig um þetta sorglega dauðsfall. Hún sagði á Facebook-síðu sinni á dögunum, eins og DV greindi frá, að það þyrfti að tala upphátt um þetta sorglega mál. Um sé að ræða miklar fyrirmyndir ungs fólks á Íslandi í dag sem séu í mikilli hættu vegna ofneyslu eiturlyfja. Helga Vala sagði:
„Eiturlyf drepa! Það er bara þannig. Það er ekkert öðruvísi heldur drepa þau, stundum hægt og rólega en stundum fyrirvaralaust eftir gott djamm. Mikið væri frábært ef fyrirmyndir krakkanna okkar kæmu nú fram og töluðu af alvöru um það hversu sjúklega hættuleg þessi neysla er,“ sagði hún og bætti við að hún vottaði aðstandendum unga mannsins innilegrar samúðar.
Í athugasemdakerfi DV í dag tjáir Bubbi Morthens sig um málið og hann kemur Gísla Pálma til varnar.
„Gísli Pálma ber ábyrgð á sjálfum sér, ekki hvað aðrir gera. Hvaða bull er þetta? Það er staðreynd að áfengi, læknadóp og morfínskyld efni eru hættuleg og geta valdið dauða þeirra sem neyta þeirra. Það er sorglegt helvíti þegar fólk lætur lífið af of stórum skammti, en Gísli Pálma ber ekki ábyrð á dauða þessarar ungu manneskju. Að gefa það í skyn er vægast sagt ömurlegt. Kannski fer Gísli Pálma í meðferð og nær að hætta áður en hann sjálfur tjónar sig. Vonandi, hann er hæfileikaríkur rappari.“