„Við erum enn að reyna að púsla þessari atburðarás saman,“ segir Troy Nehls, lögreglustjóri í Fort Bend-sýslu í Texas í Bandaríkjunum, um óhugnanlegt atvik sem varð á föstudag þegar Christy Sheats, 42 ára kona, skaut tvær dætur sínar, 22 ára og 17 ára, til bana.

Christy var skotin til bana af lögreglu eftir að hafa framið voðaverkið. Morðin framdi hún á afmælisdegi eiginmanns síns og föður stúlknanna tveggja.

Að því er People greinir frá hafði Christy átt við geðræn vandamál að stríða og hafði lögregla haft afskipti af henni áður. Nágranni hjónanna segir að þau hafi verið nýlega tekið saman aftur eftir að hafa skilið að borði og sæng um tíma.

Það var nágranni sem hringdi á lögreglu þegar hún heyrði skothvelli. Þegar lögregla mætti á vettvang er Chisty sögð hafa neitað að leggja skotvopnið frá sér með þeim afleiðingum að hún var skotin til bana. Önnur dóttirin er talin hafa látist samstundis, eða því sem næst, en hin lést á sjúkrahúsi á föstudag.

Lögreglan rannsakar málið.