Eftir fyrri heimsstyrjöldina hófu margir fyrrverandi hermenn hveitirækt í vesturhluta Ástralíu en kreppan mikla árið 1929 olli því að hveitiverð hríðféll og aðstæður þeirra urðu óbærilegar. Ofan á þetta komu tugþúsundir emúa á svæðið og átu uppskeruna, en emúar eru stórir ófleygir fuglar sem flytja sig milli staða í stórum hópum.
Bændurnir höfðu samband við sir George Pearce varnarmálaráðherra, sem sjálfur hafði barist í stríðinu, og sendi hann herflokk vopnaðan hríðskotarifflum á svæðið til að hrekja fuglana í burtu.
Marskálkurinn G.P.W. Meredith stýrði árásum á fuglana í lok október 1932 og beitti umsátrum en erfitt reyndist að ná mörgum saman. Eftir fjóra árangurslausa daga tóku hermennirnir eftir því að emúahóparnir voru með eigin leiðtoga, „stóra svartfiðraða fugla sem fylgdust með hermönnunum og vöruðu félaga sína við árásum.“ Eftir viku bardaga voru aðeins örfáir fuglar dauðir.
Niðurlægingin olli því að herinn dró sig til baka 8. nóvember en Meredith fékk annað tækifæri tæpri viku síðar og barðist við fuglana til 10. desember. Þá höfðu alls 986 emúar verið drepnir og aðgerðum hætt.
Aðgerðin hafði ekki tilætluð áhrif og fuglarnir átu hveiti næstu árin. Má því segja að ástralski herinn hafi beðið ósigur í hinu mikla emúastríði.
