Andlit leikarans og leikstjórans góðkunna, Gísla Arnars Garðarssonar, prýddi auglýsingaspjöld á Cannes nýlega. Um er að ræða auglýsingaplakat sjónvarpsþáttanna One Night sem Øystein Karlsen leikstýrir og skrifar handrit að.

Tveir leikarar leika aðalkarlhlutverk myndarinnar, Gísli Örn í ensku útgáfunni og Anders Baasmo Christiansen í þeirri norsku. Mótleikkona þeirra, MyAnna Buring, leikur hins vegar í báðum útgáfum, en tökur þeirra fóru fram á sama tíma í október og nóvember á síðasta ári. Hún leikur þó á sænsku í norsku útgáfunni, en þættirnir eru alls tíu.

One Night fjallar um par sem kynnist á blindu stefnumóti. „Hver sena var tekin tvisvar, á ensku og norsku. Vegna andláts í fjölskyldu Anders gat hann ekki leikið í báðum útgáfum. Þannig að Gísli Örn tók það að sér,“ segir Karlsen. „Gísli Örn kom inn með þriggja daga fyrirvara, sem er frábært. En það sem er líka vert að minnast á er að Buring fór í gegnum 250 blaðsíðna handrit, á tveimur tungumálum, með þriggja mánaða gamalt barn sitt sem er á brjósti.“