„Fyrsta skiptið sem mér var sagt upp,“ segir söngkonan Þórunn Antonía í myndskeiði sem birt er á Facebook-síðu kvikmyndarinnar Hjartasteins sem slegið hefur í gegn hér heima og erlendis. Aðstandendur hafa leitað til þjóðþekktra einstaklinga til að rifja upp æskuminningar. Byrjað var á fyrsta kossinum en í myndskeiði hér fyrir neðan segir Þórunn Antonía frá því þegar kærastinn ákvað að slíta sambandinu á óhefðbundinn hátt.

„Fyrsti kossinn, fyrsti kærastinn, hann bað mig um að hitta sig fyrir utan Tónabæ klukkan fjögur daginn eftir, sem ég ætlaði að gera, bæði af forvitni og meðvirknisaðstæðum,“ segir Þórunn. Hún komst þó ekki þar sem hún varð fyrir óhappi og þurfti að dvelja á slysadeild á sama tíma.

„Þegar ég kom heim um kvöldið, lúin eftir að hafa beðið upp á slysó, þá fæ ég símtal. Þar er kona á hinni línunni. Hún segir:

„Góða kvöldið Þórunn. Ég er móðir hans Ölla. „Hann vill hætta með þér.“

Þórunn segir að Ölli hafi tekið afar nærri sér að Þórunn hafi ekki komið og hélt af stað heim á leið grátandi.

„Þannig að fyrirgefðu Ölli, úr Garðabænum sem var í röndóttri stússípeysu í Tónabæ einhver tímann þegar ég var 12 ára.“

Gaman væri að heyra í Ölla. Geta lesendur DV haft uppi á honum?