Söngkonan Elísabet Ormslev gaf í dag út sitt fyrsta lag, Moving on. Elísabet á ekki langt að sækja sönghæfileikana, en móðir hennar er ein af okkar ástsælustu söngkonum, Helga Möller.

Lag og texta semur Elísabet í samvinnu við Örlyg Smára.

Á Facebooksíðu sinni skrifar Elísabet: „Þetta er risastórt skref í lífinu fyrir mig og ákveðinn sigur að láta þetta allt saman verða að veruleika. Ég er svo yfirnáttúrulega þakklát fyrir alla ástina og umfram allt alla þá sem hafa hjálpað mér og sýnt mér allan þennan stuðning í að gera þetta vel. Endalaus ást og þakklæti!!“

Við uppfærslu tónlistarmyndbandsins á youtube í dag urðu smá byrjunarörðugleikar þar sem útgáfan sem sett var inn var í mono, en ekki stereo. Baðst Elísabet velvirðingar á því á Facebooksíðu sinni í dag, en ljóst er að fall er fararheill því lagið er stórgott og Elísabet á framtíðina fyrir sér í tónlistarheiminum.