Starfsfólk í verslunum Krónunnar hefur undanfarið keppst um titilinn Flokkari ársins. Keppnin hefur verið haldin þrjú ár í röð og hefur þróast í nokkurs konar innanhúss „bikarkeppni” þar sem verslanir reyna að ná sem hæstu flokkunarhlutfalli.
Í myndbandi Krónunnar sést meðal annars þegar sigurvegarinn fyrir árið 2025 er krýndur. Verslun Krónunnar í Borgartúni bar sigur úr býtum með flokkunarhlutfall upp á 93,3%, sem þýðir að almennt sorp var aðeins 6,7%.
Karolina Polak, verslunarstjóri í Borgartúni, tók við verðlaunagripnum frá Guðmundi Jónssyni, verslunarstjóra á Hvolsvelli sem vann keppnina árið áður.
Veitt voru verðlaun í þremur flokkum auk viðurkenningar fyrir hástökkvara ársins. Auk Borgartúns sigruðu Hvolsvöllur og Selfoss í sínum stærðarflokki, en Hamraborgin var hástökkvari ársins með 14% bætingu.
Myndbandið fangar vel stemninguna og keppnisskapið í kringum keppnina og sýnir hvernig flokkun hefur orðið hluti af daglegu starfi verslananna og menningu Krónunnar.
