„Fer nú ekki að verða tímabært að fyrrnefnda þjóðin fái sérstaka akrein á helstu umferðaræðum höfuðborgarinnar? Til að byrja með gæti sú síðarnefnda í merkta pelsinum notast við hjólabrautir og gangstéttir.“

Þetta skrifaði rithöfundurinn og leikstjórinn Þráinn Bertelsson á Facebook og birti mynd af manni sem klæddist engu nema pels. Á myndinni mátti sjá kynfæri mannsins. Þráinn þykir beittur penni og hefur sterkar skoðanir. Í þetta sinn nýtti hann umræðu um umdeilda merkta pelsa sem Peta ætlaði að gefa Fjölskylduhjálp Íslands til að bauna á ráðamenn.

Stjórnendum Facebook þótti myndin heldur gróf og hefur nú fjarlægt bæði hana og textann sem fylgdi. Er Þráinn afar ósáttur við þá ákvörðun og segist ætla kveðja samfélagsmiðilinn. Fjölmargir vina hans hafa biðlað til hans að endurskoða ákvörðun sína og halda áfram að gera þeim glaðan dag. Þráinn segir:

„Jæja, elskurnar, Ameríkanarnir sem eiga Facebook fengu hland fyrir hjartað þegar ég leyfði mér að birta mynd af allsberum karlmanni með Facebookfærslu hérna og tóku sig til og fjarlægðu bæði myndina og færsluna.“

Þráinn kveðst ekkert hafa á móti ritstjórn. Hún sé nauðsynleg öllum metnaðarfullum fjölmiðlum. En nú hafi stjórnendur Facebook farið yfir strikið.

„ … en ritstjórn af þessu tagi er heimskulegri en allt sem heimskulegt er. Og lýkur þá mínum ferli hérna á Facebook. Takk fyrir samfylgdina,“ segir Þráinn