Leiðir þeirra Helga Valdimarssonar, fyrrverandi prófessors og deildarforseta Læknadeildar, og Guðrúnu Agnarsdóttur, læknis og fyrrum þingkonu lágu saman á sjöunda áratugnum. Á dögunum ákvað Helgi að koma sinni heittelskuðu rækilega á óvart með hjálp sona þeirra tveggja og Háskóla Íslands, en þar kynntust þau hjónin.

Á fésbókarsíðu Háskóla Íslans segir að læknisfræðin hafi leitt saman hjónin en bæði námu þau við háskólann á sjöunda áratug síðustu aldar. Fór þá kennsla í læknisfræði fram í Aðalbyggingu og læknanemar höfðu lesaðstöðu bæði á fyrstu og annarri hæð. Um það leyti sem þau voru að draga sig saman mátti finna grammófón í bakherbergi Hátíðasalar skólans en hann var nýttur við ýmis tilefni og ómurinn frá honum barst um alla byggingu.

„Af og til laumaðist Helgi hins vegar úr lesaðstöðunni á fyrstu hæð og upp í Hátíðasal og lék part úr fertugustu sinfóníu Mozarts á grammófóninn en það var leynilegt merki til Guðrúnar, sem sat við lestur á annarri hæð, um að taka sér hvíld frá lestrinum og koma og hitta hann.“

Það var síðan í gær að Guðrún fagnaði afmæli sínu og um leið fögnuðu þau Helgi 50 ára brúðkaupsafmæli. Af því tilefni. fékk Helgi syni þeirra hjóna, þá Agnar og Kristján, og starfsmenn Háskóla Íslands í lið með sér til að koma Guðrúnu á óvart.

Glæsilegar veitingar biðu Guðrúnar.

Þegar Helgi leiddi Guðrúnu í óvænta heimsókn í Hátíðasal Aðalbyggingar í morgun hljómuðu tónar úr fertugustu sinfóníunni á ný í hátölurum salarins og þar biðu jafnframt synir, tengdadóttir og barnabörn með kampavín og jarðarber til þess að fagna þessari merkisstund þeirra hjóna.

Ljóst er að Helga tókst ágætlega upp með ætlunarverk sitt, enda mátti greina mikinn gleðisvip hjá Guðrúnu. Sjálfur kveðst reyndar ekki vera mjög rómantískur í sér. „Ég hef nú ekki verið mikill rómantíker. Guðrún hefur alla tíð verið rómantískari en ég.“