„Hvenær fæ ég prinsessuna, það var aðalmálið,“ segir Brynjar Orri Oddgeirsson í heimildarþáttaseríunni Bara geðveik. Umsjónarmaður er Lóa Pind og verður fyrsti þáttur sýndur í kvöld á Stöð 2.
Í kvöld segir Brynjar Orri sögu sína en hann er með geðhvörf. Geðhvarfasýki telst til geðrofssjúkdóma þar sem einstaklingurinn missir oft raunveruleikatengsl, fær jafnvel ofskynjanir og ranghugmyndir þegar hann er í örlyndi. Ein af þeim hugmyndum sem gróf sig um í kollinum á Brynjari var að hin heimsfræga söngkona, Rihanna ætti að verða konan hans.
„Hún heitir Robyn og ef þú endurraðar stöfunum kemur Bryn O. Ég heiti Brynjar Orri. Ég var bara já ókei, þetta er hún,“ segir Brynjar og bætir við: „Ég var bara viss um að Rihanna væri að bíða eftir mér í brúðarkjól þegar ég kæmi upp í Viðarás 18.“
Brynjar segir það hafa verið áfall þegar hann uppgötvaði að poppsöngkonan beið ekki eftir honum í stofunni í Viðarási. „Það tók við sjö mánaða innlögn inn á geðdeild.“
Brynjar er nú að fóta sig á ný með aðstoð lyfja. Lóa Pind mun síðan fylgja eftir fimm öðrum einstaklingum og segja sögu þeirra.
