Michelle Obama mun ekki syrgja flutninga úr Hvíta húsinu. Lengi hefur verið vitað að hún fagni því beinlínis að flytja þaðan. Hún segist ætla að halda áfram verkefnum sem hún sinnti í forsetatíð manns síns og þá sérstaklega málum sem snúa að menntun stúlkna og heilsufari barna, en hún hefur beitt sér mjög í baráttu fyrir heilsusamlegu mataræði þeirra.

Obama sagði nýlega að stjórnmál heilluðu konu hans ekki. „Hún hefði kosið kyrrlátara líf, fjarri sviðsljósinu,“ sagði hann. Aðstoðarmenn Obama hafa átt til að kvarta undan Michelle sem hefur ekki látið úthluta sér verkefnum heldur valið þau sjálf. Hún hefur ekki alltaf haft þolinmæði gagnvart þeirri miklu öryggisgæslu sem er í kringum hana og hefta frelsi hennar. Michelle hefur lagt mikla áherslu á að vernda dætur sínar tvær fyrir sviðsljósinu og reynt að veita þeim eins eðlilegt uppeldi og mögulegt er og mun hafa ráðfært sig við Hillary Clinton hvernig best væri að haga lífi barna í Hvíta húsinu.

Michelle þykir hafa staðið sig frábærlega sem forsetafrú og nýtur meiri vinsælda en eiginmaður hennar. Hún hefur mikla útgeislun og bestu augnablik í kosningabaráttunni voru ræða hennar á flokksþingi demókrata og önnur tilfinningaþrungin ræða um miður falleg ummæli Donalds Trump um konur. Demókratar vilja helst sjá Michelle í stjórnmálastarfi, en á því hefur hún alls engan áhuga.