Ingibjörg Ragnheiður Egilsdóttir kynntist forsetaframbjóðandaum Donald Trump þegar hún keppti fyrir hönd Íslands í Miss Universe árið 2009 en Trump var þá eigandi keppninnar. Þetta kemur fram í Fréttatímanum.
Trump hefur í ófá skipti verið sakaður um kvenfyrirlitningu og ruddalega framkomu í garð kvenna nú í aðdraganda forsetakosninga í Bandaríkjunum en í samtali við Fréttatímann segir Ingibjörg kynni sín af Trump hafa verið góð.
Keppnin var umdeild en Donald Trump var þá sakaður um að hafa hagrætt úrslitum keppninnar og valið sex af þeim fimmtán fallegustu eftir eigin smekk. Í frétt DV árið 2009 var greint frá því að Ingibjörg hefði verið meðal fimmtán efstu en ekki verið í hópi sex fallegustu.
Þar var einnig haft eftir Michael Scwandt, danshöfundi keppninnar, að Trump hafi valið þær sex fallegustu eftir eigin sannfæringu. Í frétt DV sagði: „Hann segir að þær fimmtán efstu raði sér upp eftir stafrófsröð, Trump líti yfir hópinn og láti svo aðstoðarmenn taka glósur eftir honum.“
Ingibjörg kveðst hafa spjallað við Trump nokkrum sinnum á undirbúningi keppninnar stóð og hefur ekkert nema gott um hann að segja:
„Samskipti okkar Trump voru góð. Hann var vingjarnlegur við mig og ég upplifði enga fyrirlitningu, eins og aðrir hafa lýst í fjölmiðlum. Hann var svolítill daðrari í eðli sínu en reyndist mér vel. Ég upplifði hann ekki sem eitthvað „monster.“
Í viðtali við DV árið 2009 sagði Ingibjörg:
„Þetta var algjör paradís og það var komið fram við okkur eins og prinsessur. Auðvitað langaði mig að vinna en að ná svona langt er mikið afrek komandi frá litla Íslandi svo þetta er bara gleðilegt.“
„Ég er komin með boð sem fyrirsæta úti og er að að skoða það en mig langar að fara til New York og reyna fyrir mér. Kannski fæ ég ekkert út úr því nema reynsluna en ég ætla að prófa,“ segir hún og bætir við að henni hafi boðist ýmis spennandi verkefni sem séu enn í athugun.“
Í Fréttatímanum segir Ingibjörg að Trump hafi aðstoðað hana seinna við að komast á fund hjá umboðsskrifstofu keppninnar. Þá lýsir Ingibjörg því þannig að ímynd Trump eigi sér fasta stoð í raunveruleikanum.
Viðtal Fréttatímans við Ingibjörgu má sjá hér.
