Tæplega fertugur Belgi berst fyrir því að fá að deyja, þar sem hann segist ekki geta sætt sig við að vera samkynhneigður. Að hans sögn segist honum líða eins og fanga í eigin líkama.

Maðurinn birtist nýverið í viðtali í breska ríkissjónvarpinu, BBC, þar sem hann sagði frá líðan sinni. Í þættinum kom hann fram undir nafninu Sebastien.

Sebastien var alinn upp við rómverska-kaþólska trú og barðist móðir hans við veikindi þegar hann var ungur. Þrátt fyrir að hafa eytt samfleytt sautján árum í hinar ýmsu meðferðir, segist hann samt ekki geta sætt sig við kynhneigð sína. Af þeirri ástæðu vill hann gangast undir líknardráp sem er löglegt í Belgíu.

„Ég var mjög einmana og átti erfitt með að fara út. Ég var mjög feiminn og vildi ekki vera samkynhneigður. Ég hef alltaf hugsað um dauðann. Það er hrikalegt að þurfa að vera fangi í eigin líkama,“ sagði hann í viðtalinu um æsku sína en móðir hans glímdi við Alzheimer-sjúkdóminn. Til að Sebastien verði að ósk sinni þurfa þrír læknar að sammælast um að líknardráp sé réttlætanlegt.

Sebestian, sem kveðst laðast að ungum karlmönnum, vill að komið verði upp úrræði fyrir fólk sem ekki er sátt við eigin kynhneigð í Belgíu.

Þegar hann var spurður hvort einhverjar líkur væru á því að honum myndi snúast hugur, svaraði hann: „Ef einhver getur komið með kraftaverkalækningu fyrir mig, hvers vegna ekki. En eins og staðan er núna hef ég enga trú á því að hún komi. Ég er uppgefinn.“

Sífellt fleiri taka þá ákvörðun að enda líf sitt í Belgíu með líknardrápi. Fordæmi eru fyrir því að einstaklingar sem glímt hafa verið alvarlegt og ólæknanlegt þunglyndi hafi fengið að gangast undir líknardauða.