Frank Sinatra yngri lést í gær, 72 ára að aldri
Sonur stórsöngvarans Frank Sinatra, Frank Sinatra yngri lést eftir hjartaáfall í gær sem hann fékk á tónleikaferðalagi sínu um Bandaríkin. Hann var staddur á Daytona í Flórída þegar hann lést samkvæmt fréttatilkynningu á heimasíðu Sinatra -fjölskyldunnar. Hann var 72 ára að aldri.
Sinatra yngri fæddist þann 10. janúar 1944. Hann var miðbarn Frank Sinatra og hans fyrstu konu, Nancy Barbato Sinatra. Hann lætur eftir sig soninn Michael og tvær systur, þær Nancy og Tinu Sinatra.
Margir frægir einstaklingar á borð við Larry King og Seth MacFarlane hafa minnst Sinatra yngri á Twitter í dag.
Blaðamaður DV heyrði í Geir Ólafssyni söngvara sem gjarnan hefur verið kallaður „hinn íslenski Frank Sinatra“. Geir hafði ekki heyrt af fráfalli Sinatra þegar blaðamaður heyrði í honum, en honum þótti þetta sorglegt að heyra.
„Sinatra Jr. var mikill listamaður bæði sem stjórnandi og söngvari. Hann hélt nafni föður síns vel á lofti,“ segir Geir. Að sögn Geirs segist hann því miður ekki hafa fengið að hitta Sinatra yngri, þó það hafi staðið til að fá hann hingað til lands til að stjórna hljómsveit, en því miður varð ekkert að því.
„Hann gerði rosalega mikið fyrir músíkina og sérstaklega fyrir Big Band-tónlistina. Hann hélt henni uppi. Þeir feðgar voru stórkostlegir,“ segir Geir.
„Ég samhryggist tónlistinni.“ segir Geir að lokum.
Hér að neðan má sjá myndband af feðgunum syngja saman:
[youtube https://www.youtube.com/watch?v=Qq5pJV5UBew&w=560&h=315]
