Fjölskylda konu, sem sögð hafa verið laundóttir Freddie Mercury, söngvara Queen, hefur staðfest að hún sé látin, aðeins 48 ára að aldri, eftir langa baráttu við sjaldgæft krabbamein í hrygg.
Daily Mail greinir frá því að Mercury hafi kallað dóttur sína „Bibi“ og einnig notað gælunöfnin „trésor“, sem þýðir fjársóður á frönsku og „litla froskinn sinn“. Tilvist dótturinnar kom fyrst fram opinberlega í bókinni Love Freddie, eftir Lesley-Ann Jones, sem kom út síðasta sumar.
Þar hélt Jones því fram að Mercury hefði eignast barnið í leynilegu sambandi árið 1976 og haft náið samband við hana allt til dauðdags árið 1991. Jones fullyrti í bókinni að hún hefði í fórum sínu DNA-gögn sem styddu fullyrðinguna.
Þá kom fram að Mercury hefði samið fleiri en eitt Queen-lag um dótturina og samband þeirra , þar á meðal lögin Bijou og Don’t Try So Hard.
Konan, sem gekk einungis undir dulnefninu „B“, vildi aldrei stíga fram undir fullu nafni þar sem hún starfaði sem læknir og óttaðist að það gæti haft áhrif á feril sinn og sjúklinga. Í umfjöllun Daily Mail kemur fram að ekkill konunnar, nefndur Thomas, hafi sagt að eiginkona hans hafi látist eftir langa baráttu við strengjaæxli, afar sjaldgæft krabbamein í hrygg. Þau hafi átt saman tvo syni, níu og sjö ára gamla. Útför hennar hafi þegar farið fram og ösku hennar hafi verið dreift yfir Alpana.
Í yfirlýsingu Jones kemur fram að hún sé harmi slegin eftir fráfall konunnar enda hafi þær orðið nánar vinkonur við vinnslu bókarinnar. Það hafi verið dótturinni mikið hjartans mál að koma sannleikanum á framfæri um líf föðursins heimsfræga. Í bókinni kemur fram að Mercury hafi haldið tilvist dóttur sinnar algjörlega leyndri. Dóttirin fylgdist með ferðum hans og tónleikum Queen á heimskorti sem hann gaf henni. Bókin byggir á sautján bindum af dagbókum sem hún fékk frá föður sínum árið 1991, skömmu áður en hann lést úr lungnabólgu af völdum alnæmis. , skömmu áður en hann lést úr lungnabólgu af völdum alnæmis.
Fyrrverandi unnusta Mercury, Mary Austin, hefur dregið fullyrðingarnar í efa. Í viðtali við Sunday Times í ágúst sagðist hún yrði „undrandi“ ef Mercury ætti dóttur og hélt því fram að hann hefði ekki haldið dagbækur eða persónulegar minnisbækur. Jones segir lögmenn Austin hafa reynt að stöðva útgáfu bókarinnar, án árangurs.
Í umfjöllun Daily Mail kemur fram að fjölskylda hinnar látnu dóttur íhugi nú að opinbera myndir af feðginunum til þess að kveða niður efasemdarraddir.
