Ragnhildur Þórðar, betur þekkt sem Ragga Nagli, ræðir um þetta í nýjum pistli á Instagram.
Ragnhildur er sálfræðingur með áherslu á heilsusálfræði og lærður einkaþjálfari.
„Daglegar sveiflur í þyngd eru eðlilegar. Þær eru ekki vísbending um árangur eða mistök,“ segir hún og útskýrir nánar:
„Breytingar á saltmagni í líkamanum, vatnsbúskapur, hormónar, tíðahringur, glýkógenbirgðir hafa áhrif á líkamsþyngd.
Ef þú dýfðir þér í sushibakkann á föstudag, dúndraðir þig í snakki, saltstöngum á laugardagskvöld, slátraðir nokkrum brauðsneiðum í sunnudagsbröns og húrraðir í þig kökusneiðum í desa um kvöldið.
Þá ertu með ansi góða birgðastöðu af kolvetnum á lagernum í dag.
Þar af leiðandi er líkaminn að halda í fleiri lítra af vökva.
Því fyrir hvert gramm af kolvetnum þarf að binda 2,7-3 grömm af vatni.
Meira glýkógen og meira vatn í skrokknum þýðir meiri líkamsþyngd.
Og óhjákvæmilega hærri tala á vigtinni.“
Ragnhildur leggur áherslu á að: „Þetta er EKKI LÍKAMSFITA!!“
„Þú þarft ekki að sleikja þig á horrimina það sem eftir er vikunnar með djúsföstu, kálblaði, sjúgandi ísmola, fastandi til hádegis og bryðja megrunarkaramellurnar sem mamma þín geymdi frá 1970,“ segir hún.
„Þú þarft ekki að anda í bréfpoka í kvíðakasti. Þú hefur ekki klúðrað neinu. Ekkert er ónýtt. Þú ert ekki lúser og landeyða. Þú þarft bara að henda þér aftur í þitt fyrra mataræði með hollum máltíðum… og já líka kolvetnum.
Engar dramatískar skaðastjórnunaraðgerðir. Þú pissar þessu bara út yfir næstu daga. Og ert með stútfullan bensíntank fyrir átökin við járnið.“
View this post on Instagram
