Helga Braga Jónsdóttir er landsþekkt til áratuga sem leikkona og skemmtikraftur, fyrir nokkrum árum bætti hún síðan flugfreyjustarfinu við ferilskrána.
„Ég var búin að neita þessu lengi: „Ég er ekki skemmtikraftur, ég get alveg verið fyndin, en ég er ekkert að fara gera þetta“, segir Helga sem hóf feril sinn í uppistandi árið 1998. En svo kom hugrekkið: „Ef Steinn Ármann, bekkjarbróðir minn úr Leiklistarskólanum, getur gert þetta, þá get ég gert þetta,“ segir Helga sem varð sextug í nóvember í viðtali í Ísland vaknar á K100.
Helga Braga segir margt fara í taugarnar á henni.
„Ég er ekki „hater“. Það er ekkert sem ég hata eða neitt svoleiðis … auðvitað, eins og það gefur auga leið, hata ég ofbeldi. Sérstaklega á börnum og dýrum sem geta ekki borið hönd yfir höfuð sér. Og ókurteisi.
Svo er meira svona sem fer í taugarnar á mér. Þegar fólk potar í mig. Sérstaklega um borð í flugvél. Potar…Það er bannað, en fólk gerir það samt. Stundum get ég sagt: „Vinsamlegast ekki koma við mig.“ En það tók mig alveg langan tíma að fá kjark til að gera það. Af því að ég vil vera svo kurteis. En ekki pota.“
Helga Braga segir fólk, sérstaklega konur, fara yfir strikið þegar hún er við vinnu sína í skemmtanabransanum.
„Af því ef karlmenn fara yfir strikið þá segir maður bara: Farðu! En sko, konur. Þær vildu kannski knúsa mig, og tóku mig þá gjarnan hálstaki. Vildu sýna mér hvað þær væru sterkar, eins og Gyða Sól, fara í karakter. En ég er kannski bara ofsalega fínn veislustjóri. Taka mig hálstaki af því að þær eru svo hressar.“
Viðtalið má hlusta á í heild sinni hér.
