Tónlistarkonan Hildur Kristín Stefánsdóttir sá fyrir sér að árið 2025 yrði mikið tónlistarár, hún var að gefa út fyrstu sólóplötuna sína í janúar og ætlaði að vera óstöðvandi. En síðan lenti hún harkalega á vegg en ætlaði ekki að trúa því að hún væri að lenda í kulnum í þriðja skiptið. Hildur er gestur vikunnar í Fókus, viðtalsþætti DV, þar sem hún ræðir um kulnun, ADHD, hvernig hugleiðsla breytti öllu, það sem hún hefur lært um taugakerfið og svo margt annað.
Hlustaðu á þáttinn á Spotify og öllum helstu hlaðvarpsveitum. Textabrot úr þættinum má lesa hér að neðan.
Hildur fer um víðan völl í viðtalinu og berst talið að heilsumenningu (e. wellness culture), sem mjög vinsæl núna á samfélagsmiðlum en eins og svo margt annað þá virðist hún hafa færst í öfgana. Það er ógrýnni af myndböndum þar sem fólk deilir sinni „self-care“ rútínu og er þetta oft langt ferli með mörgum skrefum, það þarf að vakna klukkan fimm til að hefja rútínuna og kaupa ýmsar vörur til að fullkomna hana.
„Mér finnst það bara vera kvíðavaldandi. Sérstaklega hvernig þetta er oft sett fram,“ segir Hildur og bætir við að þó fólk meini oftast vel með þessum myndböndum þá geti þau haft skaðleg áhrif á aðra.
„Það er líka oft verið að sýna mikið af hlutum sem fólk þarf að kaupa, þetta er náttúrulega ákveðin sölumennska og margir sem eru að gera þessi myndbönd fá þessa hluti gefins […] Það er bara flókið yfir höfuð hvernig samfélagsmiðlar láta mann oft efast um sjálfan sig. Eins og: Ef ég ætla að eiga gott líf þá verð ég að vera með tíu skrefa morgunrútínu. Ég held að við konur upplifum þetta sérstaklega, þessu er beint mikið að okkur,“ segir hún.
„Manni líður eins og maður þarf að kaupa alla þessa hluti og gera allt þetta til að vera eðlileg. Ég held þetta hafi líka meiri áhrif á þig ef þú ert með lágt sjálfstraust, í ójafnvægi eða kvíðin að eðlisfari eða eitthvað svoleiðis. Þá eru þessi skilaboð miklu líklegri til að láta þér líða illa.“
„Mér finnst líka mjög erfitt að horfa á áhrifin sem þetta hefur á unglingsstelpur. Ég á þrettán ára stjúpdóttir og hennar morgunrútína er orðin mjög flókin. Þetta er svo mikið flækjustig á lífinu, að halda að við þurfum að fara í gegnum þetta allt til að eiga eðlileg lífsskilyrði.“
Hildur ræðir þetta nánar í þættinum sem má hlusta á hér. Hún opnaði í haust síðuna Anda inn (@anda.inn) á TikTok og Instagram þar sem hún deilir alls konar fróðleik, ráðum og öðru tengdu rólegra lífi og náttúrulegum leiðum til að líða betur.
