Fjölmiðlamaðurinn Frosti Logason bæði elskar og hatar veðrið sem hefur verið undanfarna daga. Hann elskar snjóinn, finnst fallegt þegar allt er svona hvítt, en hann hatar umferðina og fer hörðum orðum um aksturshæfileika landsmanna. Hann segir að aðeins lítill hluti þjóðarinnar kunni að keyra í svona veðri og það sýni sig á dögum eins og þessum.
„Það er fallegt veðrið. Ég elska þegar það er allt svona á kafi í snjó. Ömurlegt þegar það er slabb og smá snjór, en ef það er allt gjörsamlega að drukkna í snjó þá er það fallegt. Það birtir upp skammdegið og svona,“ segir Frosti í nýjasta þætti af Harmageddon.
„En reyndar, það er alveg ljóst að 95 prósent Íslendinga eiga ekki að vera úti að keyra þegar þetta ástand varir. Það er eins og þeir hafi ekki fengið neina þjálfun í því að keyra í snjó og umferðin verður þess vegna mjög, mjög þung.“
Ingimar Elíasson, tæknimaður í Harmageddon, varpar fram þeirri kenningu að allir þeir sem vilja Borgarlínuna séu í hóp þessara 95 prósenta.
„Hundrað prósent, þeir eru allir þar,“ segir Frosti og bætir við kíminn:
„Það kemur líka alltaf í ljós einhvern veginn, þegar ég er í þessu umferðarástandi, þá sannast alltaf fyrir mér að það eru allir aðrir en ég fávitar í þessari veröld.“
Brot úr þættinum má horfa á hér að neðan en til að horfa á hann allan smelltu hér.
